റിയാദ് വിമാനത്താവളത്തിന് നേരെ ആക്രമണം: പാകിസ്ഥാനി കൊല്ലപ്പെട്ടു, 11 പേര്‍ക്ക് പരിക്ക്; ദമാമിലും ആക്രമണം
Mon, 12 Oct 2026
വാഷിങ്ടണ്‍: ഇറാനെതിരായ സൈനിക നടപടി ശക്തമാക്കുന്നതിനെക്കുറിച്ച് പ്രസിഡന്റ് ഡൊണള്‍ഡ് ട്രംപ് ആലോചിക്കുന്നതിനിടെ, മധ്യപൂര്‍വദേശത്തേക്ക് മൂന്നാമത്തെ വിമാനവാഹിനിക്കപ്പല്‍ സംഘത്തെ അയച്ച് അമേരിക്ക. യുഎസ്എസ് തിയഡോര്‍ റൂസ്‌വെല്‍റ്റ് വിമാനവാഹിനിക്കപ്പല്‍ കാരിയര്‍ സ്‌ട്രൈക്ക് ഗ്രൂപ്പിനൊപ്പം യുഎസ് സെന്‍ട്രല്‍ കമാന്‍ഡിന്റെ മധ്യപൂര്‍വദേശത്തെ പ്രവര്‍ത്തനമേഖലയിലേക്കാണ് നീങ്ങുന്നത്. നിരവധി യുദ്ധക്കപ്പലുകള്‍ ഉള്‍പ്പെടുന്നതാണ് കാരിയര്‍ സ്‌ട്രൈക്ക് ഗ്രൂപ്പ്. 2,000ലേറെ നാവികരെ വഹിക്കുന്ന പ്രത്യേക ആംഫിബിയസ് ഗ്രൂപ്പും മേഖല ലക്ഷ്യമാക്കി പുറപ്പെട്ടിട്ടുണ്ട്. റൂസ്‌വെല്‍റ്റ് കാരിയര്‍ സ്‌ട്രൈക്ക് ഗ്രൂപ്പ് നവംബര്‍ അവസാനത്തോടെ മധ്യപൂര്‍വദേശത്ത് എത്തുമെന്നാണ് യുഎസ് ഉദ്യോഗസ്ഥരെ ഉദ്ധരിച്ച് റിപ്പോര്‍ട്ടുകള്‍. നിലവില്‍ യുഎസ്എസ് ജോര്‍ജ് എച്ച്.ഡബ്ല്യു. ബുഷ്, യുഎസ്എസ് ജോര്‍ജ് വാഷിങ്ടണ്‍ എന്നീ വിമാനവാഹിനിക്കപ്പലുകള്‍ മേഖലയില്‍ വിന്യസിച്ചിട്ടുണ്ട്. ജപ്പാനില്‍ ആസ്ഥാനമുള്ള ജോര്‍ജ് വാഷിങ്ടണിന് പകരമായാണ് റൂസ്‌വെല്‍റ്റ് എത്തുകയെന്നാണ് റിപ്പോര്‍ട്ട്. ഓഗസ്റ്റിലാണ് ജോര്‍ജ് വാഷിങ്ടണ്‍ മധ്യപൂര്‍വദേശത്ത് എത്തിയത്. നേരത്തെ ഇവിടെ പ്രവര്‍ത്തിച്ചിരുന്ന യുഎസ്എസ് എബ്രഹാം ലിങ്കണിന് പകരമായിരുന്നു അത്.
ഇറാനുമായി സംഘര്‍ഷം നിര്‍ണായക ഘട്ടത്തില്‍
ഇറാനുമായുള്ള സംഘര്‍ഷം നിര്‍ണായക ഘട്ടത്തിലൂടെയാണ് കടന്നുപോകുന്നത്. കഴിഞ്ഞയാഴ്ച ന്യൂയോര്‍ക്കില്‍ നടന്ന ഐക്യരാഷ്ട്രസഭാ പൊതുസഭാ സമ്മേളനത്തിനിടെ അമേരിക്കയും ഇറാനും പരോക്ഷ ചര്‍ച്ചകള്‍ നടത്തിയിരുന്നു. അതേസമയം, ഇറാനെതിരെ പുതിയ സൈനിക നടപടി സ്വീകരിക്കുമെന്ന മുന്നറിയിപ്പും ട്രംപ് തുടരുകയാണ്. ഐക്യരാഷ്ട്രസഭാ പൊതുസഭയെ അഭിസംബോധന ചെയ്യുന്നതിനിടെ ട്രംപ്, ഇറാനുമായി കരാറിലെത്തുകയോ ഇറാനെ ‘നരകത്തിലേക്ക് തള്ളുകയോ’ ചെയ്യേണ്ട സാഹചര്യമാണ് തനിക്കുള്ളതെന്ന് പറഞ്ഞിരുന്നു. നവംബര്‍ മൂന്നിലെ യുഎസ് ഇടക്കാല തിരഞ്ഞെടുപ്പിന് ശേഷം ടെഹ്‌റാന്‍ കരാറിന് തയ്യാറായേക്കാമെന്നും അദ്ദേഹം സൂചിപ്പിച്ചിരുന്നു. അതേസമയം ഇറാന്‍ ഭരണകൂടത്തെ ‘നശിപ്പിച്ചുകളയാം’ എന്ന കടുത്ത മുന്നറിയിപ്പും അദ്ദേഹം നല്‍കിയിരുന്നു. വ്യാഴാഴ്ച ഇറാന്‍ പ്രസിഡന്റ് മസൂദ് പെസെഷ്‌കിയാന്‍ ചര്‍ച്ചകളില്‍നിന്ന് ഇറാന്‍ ഒരിക്കലും പിന്മാറിയിട്ടില്ലെന്നും ഭാവിയിലും പിന്മാറില്ലെന്നും വ്യക്തമാക്കി. എന്നാല്‍ അമേരിക്കന്‍ പ്രസിഡന്റിന്റെ നിലപാട് ഇപ്പോഴും കടുത്തതാണ്. ‘വളരെ ന്യായമായ കരാറില്‍ ഒപ്പിടാന്‍ ഇറാന്‍ തീരുമാനിക്കണം; അല്ലെങ്കില്‍ അവര്‍ ഇനി നിലനില്‍ക്കില്ല’ എന്നാണ് ട്രംപ് പറഞ്ഞത്.
അമേരിക്കന്‍ സൈനികരുടെ ആത്മഹത്യാശ്രമങ്ങള്‍
പുതിയ സൈനിക വിന്യാസത്തിനിടെ യുഎസ് നാവികസേനയ്ക്കുള്ളിലെ മറ്റൊരു സംഭവവും ശ്രദ്ധേയമായി. മാസങ്ങളോളം കടലില്‍ തുടരുന്നതിനിടെ യുഎസ്എസ് എബ്രഹാം ലിങ്കണ്‍ വിമാനവാഹിനിക്കപ്പലിലെ സാഹചര്യങ്ങള്‍ മോശമായതായി റിപ്പോര്‍ട്ടുകള്‍ പുറത്തുവന്നിരുന്നു. ലിങ്കണ്‍ കാരിയര്‍ സ്‌ട്രൈക്ക് ഗ്രൂപ്പിലെ എട്ട് സൈനികര്‍ വിന്യാസത്തിനിടെ ആത്മഹത്യയ്ക്ക് ശ്രമിച്ചതായി യുഎസ് നേവിയുടെ ആക്ടിങ് സെക്രട്ടറിയാണ് കഴിഞ്ഞയാഴ്ച വെളിപ്പെടുത്തിയത്. പുതിയ വിമാനവാഹിനിക്കപ്പല്‍ വിന്യാസം ഇറാനുമായുള്ള ചര്‍ച്ചകളും സൈനിക സമ്മര്‍ദവും ഒരേസമയം തുടരുന്ന സാഹചര്യത്തിലാണ്.
